Bllokohet transporti publik, operatorët drejt reduktimeve të tjera nëse nuk marrin kompensim
Lëvizja me autobusë u bllokua në disa zona, ndërsa operatorët paralajmërojnë përshkallëzim të situatës në mungesë të ndërhyrjes së qeverisë.
Në orët e para të mëngjesit të sotëm, transporti publik është përballur me bllokime dhe reduktime të ndjeshme në të gjithë vendin, duke krijuar vështirësi të mëdha për qytetarët.
Në Tiranë, nga rreth 200 autobusë që operojnë në afro 50 linja, kanë dalë në qarkullim vetëm 115 mjete. Si pasojë, në shumë stacione janë krijuar radhë të gjata dhe koha e pritjes është dyfishuar, sipas qytetarëve që përdorin këtë shërbim çdo ditë.
Reduktim deri në 60% në rrethe
Situata paraqitet edhe më e rënduar në qytetet e tjera, ku sipas shoqatave të transportit publik, reduktimi i mjeteve ka arritur deri në 60%. Në total, në vend funksionojnë rreth 450 linja të rregullta, të operuara nga afro 250 operatorë, të cilët tashmë po përballen me vështirësi serioze financiare.
Përfaqësuesit e sektorit paralajmërojnë se kjo është vetëm faza e parë e masave dhe se reduktimi mund të thellohet në ditët në vijim, nëse nuk ka reagim nga institucionet.
Kosto të larta nga nafta
Kryetari i Shoqatës Kombëtare të Transportit Qytetës, Kostandin Foni, deklaroi se operatorët nuk janë më në gjendje të përballojnë kostot e rritura, kryesisht nga shtrenjtimi i karburantit.
Sipas tij, në nivel kombëtar sektori konsumon rreth 850 mijë litra naftë në muaj. Me çmimet aktuale, kjo përkthehet në një kosto shtesë prej rreth 800 mijë euro në muaj vetëm për transportin qytetës, një barrë që operatorët thonë se nuk mund ta përballojnë më.
Situata është përkeqësuar që prej fillimit të muajit mars, ndërsa mungesa e një mekanizmi kompensimi nga qeveria ka rritur presionin mbi sektorin.
Kërkohet skemë kompensimi si në 2022
Shoqatat e transportit publik kanë kërkuar në mënyrë të përsëritur ndërhyrje nga Ministria e Ekonomisë, Ministria e Financave dhe bashkitë, duke propozuar një skemë të ngjashme me atë të vitit 2022.
Atëherë, përballë krizës së çmimeve, operatorët u kompensuan për një periudhë 6-mujore me rreth 100 lekë për litër naftë, një masë që sipas tyre mund të stabilizojë edhe situatën aktuale.
Pa një vendimmarrje të shpejtë, operatorët paralajmërojnë se vijueshmëria e shërbimit është seriozisht në rrezik, duke lënë të hapur mundësinë e ndërprerjeve edhe më të mëdha në ditët në vijim.
k.jpg)